Lestu um leikinn: HK 1 -  0 Stjarnan

Birnir Snær Ingason fékk að líta sitt annað gula spjald og þar með rautt fyrir dýfu að mati Vilhjálms Alvars dómara leiksins.

Vilhjálmur mætti í viðtal á Stöð 2 Sport eftir leikinn og ræddi atvikið.

„Við vorum að dæma hörku leik milli tveggja góðra fótboltaliða, okkar markmið var að leyfa leiknum að fljóta eins og við gátum og ég tel okkur hafa náð því í dag og lögðum okkar að mörkum að gera þetta að skemmtilegum leik," sagði Vilhjálmur.

Birnir fékk að líta fyrra gula spjaldið sitt fyrir að stoppa skyndisókn en örfáum mínútum síðar fékk hann sitt annað gula spjald fyrir dýfu.

„Þetta er ekki gróft brot en ástæðan fyrir því að hann fær spjald er að hann er að stöðva vænlegt upphlaup hjá Stjörnumönnum, Emil er með mikið pláss til að sækja á," sagði Vilhjálmur um fyrra spjaldið.

Um seinna spjaldið þegar Birnir fer niður í teignum:

„Í þessu atviki var ég mjög vel staðsettur, ég stóð beint fyrir aftan, það er snerting milli HK leikmannsins og Stjörnu leikmannsins en í þessu atviki er það HK maðurinn sem býr til snertingu og fyrir mér gerist hann sekur um óíþróttamannslega framkomu og þess vegna gef ég óbeina aukaspyrnu og honum gult spjald."