Besta deild kvenna: Valur úr fallsæti - FH tapaði

Valur heimsótti Þór/KA í mikilvægum fallbaráttuslag og var staðan markalaus í leikhlé. Heimakonur voru sterkari aðilinn en Valur fékk besta færið undir lok fyrri hálfleiks.

Það var lítið sem ekkert að frétta í afar bragðdaufum seinni hálfleik, allt þar til á lokamínútunum þegar Margrét Brynja Kristinsdóttir fékk boltann fyrir utan teig og lyfti honum á kollinn á Lillý Rut Hlynsdóttur sem skallaði í netið. Þór/KA reyndi að jafna í uppbótartíma en skapaði ekki mikla hættu, svo lokatölur urðu 0-1.

Valur er með 16 stig eftir 16 umferðir og lyftir sér upp úr fallsæti með þessum sigri, en þó aðeins á markatölu. Þór/KA er tveimur stigum fyrir ofan.

Í Hafnarfirði tók FH á móti botnliði Víkings R. og þurftu heimakonur sigur í toppbaráttunni, en Bergdís Sveinsdóttir náði forystunni fyrir gestina þrátt fyrir góða byrjun FH.

FH fékk mikið af hálffærum til að jafna metin en tókst ekki að koma boltanum í netið. Víkingur varðist vel og komst í færi en staðan var 0-1 í leikhlé.

FH skipti um gír í síðari hálfleik og skapaði mikið af góðum færum en boltinn rataði ekki í netið. Telma Ívarsdóttir stóð sig vel á milli stanganna og var varnarlínan öflug en vítaspyrna var dæmd á lokakaflanum. Ásdís Karen Halldórsdóttir steig á punktinn en Telma varði vel til að tryggja nauman sigur.

Þetta er annar tapleikurinn í röð hjá FH á heimavelli og er liðið þremur stigum á eftir toppliði Breiðabliks. Þetta var kjörið tækifæri fyrir Hafnfirðinga að jafna Blika á stigum eftir óvænt tap Kópavogskvenna, en þær hafnfirsku nýttu það ekki.

Víkingur situr áfram á botninum en er aðeins tveimur stigum frá öruggu sæti í deildinni eftir þennan sigur.

Það eru tvær umferðir eftir af deildartímabilinu.

Þór/KA 0 - 1 Valur
0-1 Lillý Rut Hlynsdóttir ('90 )

Lestu um leikinn

---

FH 0 - 1 Víkingur R.
0-1 Bergdís Sveinsdóttir ('22 )
0-1 Ásdís Karen Halldórsdóttir ('88 , misnotað víti)

Lestu um leikinn