Spænski þjálfarinn Xavi segist finna til með brasilíska hægri bakverðinum Dani Alves en sá síðarnefndi er ásakaður um kynferðislegt ofbeldi og situr nú á bakvið lás og slá meðan málið er til rannsóknar.
Alves er ásakaður um að hafa kynferðislega brotið á konu á skemmistað í Barcelona þann 30. desember.
Hann gaf sig fram til lögreglu fyrir helgi og var í kjölfarið yfirheyrður áður en hann mætti fyrir dómara.
Dómarinn neitaði að láta hann lausan gegn tryggingu og gistir Alves því í fangaklefa á meðan málin skýrast.
Xavi, sem bæði spilaði með og þjálfaði Alves, segist í áfalli yfir þessum fréttum.
„Það er erfitt að tjá sig um þetta mál. Ég er hissa og í raun í áfalli ef ég á að segja eins og er. Þetta snýst um réttlæti og það mun vinna sama hver niðurstaðan verður. Ég finn innilega til með Dani,“ sagði Xavi.
Athugasemdir
