Götuboltinn mótaði Olise - „Vil helst spila í tíunni“

Michael Olise átti stórkostlegt tímabil með Bayern München og er orðinn fastamaður í franska landsliðinu.

Hann hefur aðallega spilað á hægri vængnum með Bayern og Frakklandi en vakti mikla athygli þegar Didier Deschamps, þjálfari Frakka, færði hann í tíuna í síðari hálfleiknum gegn Senegal.

Olise segir í viðtali við L'Equipe að það sé sú staða sem honum líður best í.

„Hvar líður mér best? Ég held í tíunni. Það er frjálsara hlutverk og ég ólst upp sem tía. Það er því það náttúrulegasta fyrir mig. Kannski ekki akkúrat núna, þar sem ég spila á vængnum, en tíuan er mín helsta staða,“ sagði Olise.

Hreyfingar Olise eru silkimjúkar og hann segir margt af því sem hann gerir á vellinum koma úr götuboltanum í Lundúnum.

„Þetta kemur úr götuboltanum. Ég spilaði með bróður mínum, sparkaði boltanum í vegginn, fór í einn á einn og allt það. Þetta kemur þaðan. Þetta er öðruvísi fótbolti en klárlega góð leið til að læra.“

„Fótbolti við slíkar aðstæður er einfaldlega frelsi. Þetta var ekki beint lærdómur í hefðbundnum skilningi. Ég naut þess bara að spila fótbolta. Ég elskaði það, svo einfalt er það. Ég held reyndar að allir elski það þegar þeir eru ungir,“ sagði Olise.