Daníel Tristan Guðjohnsen skoraði í dag sitt fyrsta landsliðsmark fyrir Ísland er hann skoraði fyrir U17 landsliðið í 1-1 jafntefli gegn Georgíu.
Leikurinn var í undankeppni EM. Leikið er í fjögurra liða riðli í Ungverjalandi. Þetta var fyrsti leikur Íslands í riðlinum.
Georgía tók forystuna í leiknum, en Daníel Tristan jafnaði fyrir Ísland á 81. mínútu.
Daníel Tristan er yngsti sonur Eiðs Smára Guðjohnsen. Hann er aðeins 15 ára gamall og er það því merkilegt að hann sé að spila í U17 landsliðinu.
Markið í dag var það fyrsta sem hann skorar fyrir íslenskt landslið. Eins og fram kemur hjá Morgunblaðinu þá er hann sá sjötti með nafnið Guðjohnsen á bakinu til að skora fyrir Ísland.
Afi hans Arnór Guðjohnsen skoraði 14 mörk fyrir landsliðið og pabbi hans, Eiður Smári, er sá markahæsti í sögu A-landsliðsins með 26 mörk. Andri Lucas Guðjohnsen, eldri bróðir Daníels, er búinn að skora tvö A-landsliðsmörk og Sveinn Aron, elsti bróðir hans, skoraði 11 mörk fyrir yngri landsliðin; en á enn eftir að skora fyrir A-landsliðið. Arnór Borg, frændi Daníels, skoraði þá tvö mörk fyrir U19 landsliðið.
Daníel er kominn á blað í íslenska landsliðsbúningnum, í þriðja leiknum með U17 landsliðinu. Þetta verður án efa ekki hans eina mark fyrir Ísland.
Daníel er talinn mjög efnilegur. Hann er á mála hjá spænska stórveldinu Real Madrid, eins og Andri Lucas.
Þess má geta að Andri Lucas og Sveinn Aron spiluðu saman í A-landsliðinu gegn Liechtenstein fyrr í þessum mánuði. Sveinn Aron lagði upp fjórða markið í þeim leik fyrir bróður sinn með Eið Smára, aðstoðarlandsliðsþjálfara, á hliðarlínunni. Eftirminnileg stund á Laugardalsvelli.
Athugasemdir