Hólmar Örn á leiðinni til Bournemouth?

Bournemouth er í veseni í ensku úrvalsdeildinni. Varnarleikurinn hefur ekki verið upp á marga fiska og er knattspyrnustjórinn Eddie Howe í leit að liðsstyrk.

Hólmar er sagður hafa vakið áhuga enska úrvalsdeildarfélagsins. Samkvæmt heimildarmanni 90min þá er Bournemouth tilbúið að ná í hann áður en félagaskiptaglugginn lokar síðar í þessari viku.

Þá gengur 90min svo langt að segja að Bournemouth sé ekki eina enska félagið sem hafi áhuga á hinum 29 ára gamla Hólmari.

Það vinnur með honum að hann var á mála hjá West Ham á Englandi frá 2008 til 2011, án þess þó að spila leik með aðalliðinu. Hann spilaði þó fjóra aðalliðsleiki á láni hjá Cheltenham Town 2009/10 tímabilið, þannig að hann kannast eitthvað við sig í enskum fótbolta.

Hólmar hefur gert mjög vel í að koma til baka úr erfiðum meiðslum. Hann hefur á þessu tímabili spilað 15 deildarleiki í Búlgaríu og skorað þrjú mörk.

Hólmar á 14 A-landsleiki fyrir Íslands og tvö landsliðsmörk.