Leggja fram 45 milljóna evra tilboð í Leao

Galatasaray hefur lengi haft áhuga á Rafael Leao og nú virðast félögin loksins vera að nálgast samkomulag. Aston Villa dró sig úr baráttunni í dag og stefnir Portúgalinn því til Tyrklands.

Yagiz Sabuncuoglu, einn virtasti íþróttablaðamaður Tyrklands, segir Galatasaray hafa boðið 45 milljónir evra í Leao. Búist er við að AC Milan samþykki tilboðið.

Leao á enn eftir að semja við Galatasaray um kaup og kjör en ekki er talið að það muni standa í vegi fyrir félagaskiptunum.

Leao er 27 ára og hefur leikið með Milan undanfarin sjö ár. Hann var meðal annars valinn besti leikmaður ítölsku deildarinnar þegar félagið varð meistari árið 2022.