Jóhannes sá margt jákvætt í leik KR
„Í rauninni var þetta bara hnífjafn leikur. Mér fannst við skapa okkur fleiri færi en þær hins vegar klára sitt. Það var bara vilji í báðum liðum til að sækja þrjú stig og sást að það var hellingur undir. Það lið sem að tók þrjú stig í dag er svolítið að losa sig uppúr þessum botnpakka,'' sagði Jóhannes Karl Sigursteinsson, þjálfari KR eftir 2-1 tap gegn Þór/KA í Pepsi-Max deild kvenna í kvöld.
Lestu um leikinn: Þór/KA 2 - 1 KR
Leikurinn var ekki áferðafallegur í fyrri hálfleik en bæði lið skiptu um gír í seinni hálfleik og var hann mun opnari og betur spilaður.
„Við náttúrulega bara fundum að við vorum ekki að spila okkur leik í fyrri hálfleik. Við vorum alltof mikið bara að leita að úrslitasendingunni strax og ætluðum að gera þetta einfalt. Við ræddum það í hálfleik að fara meira inní okkar fótbolta, láta boltann ganga inná miðjuna og reyna að búa eitthvað til fyrir fremstu mennina frekar en að sparka bara og vona það besta,'' sagði Jóhannes.
Sigurmark Þór/KA kom úr vítaspyrnu. Hvernig horfði dómurinn við Jóhannesi?
„Í aðdragandum hélt ég að það væri einhver rangstæða í loftinu en fyrst að það var ekki, þá var ekkert annað hægt en að gefa víti. Hún er með hendina á þannig stað að það þýðir ekkert að kvarta yfir því. Svona er fótboltinn,'' sagði Jóhannes Karl Sigursteinsson.
Viðtalið má sjá í heild sinni í spilaranum hér að ofan.
Athugasemdir
