Vigfús Arnar Jósefsson.
Danska úrvalsdeildarfélagið Lynbgy hefur tilkynnt að félagið sé búið að ráða Vigfús Arnar Jósefsson sem njósnara sinn á Íslandi. Hann mun fylgjast með íslenska markaðnum fyrir Lyngby.
„Undanfarin ár hefur Lyngby náð miklum árangri með Íslendingum bæði í þjálfara- og leikmannamálum, þar sem prófílar eins og Freyr Alexandersson, Alfreð Finnbogason og nú Sævar Atli Magnússon hafa verið mikilvægir og vinsælir einstaklingar á Lundtoftevej," segir í tilkynningu Lyngby.
Lyngby ætlar núna að taka þetta upp á næsta stig með ráðningu Vigfúsar.
„Þegar ungir, metnaðarfullir og hæfileikaríkir íslenskir ??fótboltamenn hugsa um að þurfa að gera eitthvað annað en að spila í heimalandi sínu ættu þeir að hugsa um Lyngby Boldklub sem tækifæri," segir Nicas Kjeldsen, yfirmaður fótboltamála hjá Lyngby.
Vigfús kveðst spenntur fyrir þessu nýja starfi en síðastliðið sumar starfaði hann fyrst sem aðalþjálfari Leiknis og svo aðstoðarþjálfari KR.
Athugasemdir
