Besta deildin: Atli Þór kom Fram aftur á sigurbraut

Framarar komu sér aftur á sigurbraut í Bestu deild karla með 2-0 sigri á ÍA á ELKEM-vellinum á Akranesi í kvöld. Atli Þór Jónasson skoraði bæði mörk gestanna með stuttu millibili í fyrri hálfleik.

Gestirnir voru hættulegri í upphafi leiks. Fred Saraiva, Atli Þór og Róbert Hauksson fengu allir ágæt færi og markið lá í loftinu.

Þegar rúmar átján mínútur voru liðnar brutu Framarar ísinn. Atli fékk háan bolta sem hann skallaði á Róbert, sem kom honum í hlaupaleið Atla. Hann kláraði færið vel og setti boltann í nærhornið.

Framarar bættu við öðru marki þremur mínútum síðar. Israel Garcia kom boltanum inn á teiginn þar sem Erik Tobias Sandberg og Jón Sölvi Símonarson virtust hikandi. Jón Sölvi fór á endanum út úr markinu, braut á Róberti og vítaspyrna var dæmd.

Atli Þór fór á punktinn og skoraði með laglegri spyrnu niðri í vinstra hornið. Jón Sölvi var ekki langt frá því að verja en boltinn endaði í netinu.

Forysta Fram í hálfleik var sanngjörn, þó gestirnir hafi aðeins slakað á síðustu fimmtán mínútur fyrri hálfleiksins.

Í síðari hálfleik náðu heimamenn lítið að skapa sér. Fram gerði vel í að halda boltanum og róa leikinn niður.

Skagamenn náðu ekki að ógna að ráði fyrr en á síðustu mínútunum. Þeir fengu þá þrjú ágæt færi og í því þriðja bjargaði Kennie Chopart á marklínu. Þar skall hurð nærri hælum hjá Frömurum, sem náðu þó að halda út og halda hreinu.

Framarar eru því aftur komnir á sigurbraut og eru nú með 26 stig í 3. sæti deildarinnar. ÍA er með 15 stig í 7. sæti og hefur tapað tveimur leikjum í röð.