Lengjudeildin: Rúnar Ingi hetja Grindvíkinga

Grindavík fékk Leikni í heimsókn í Lengjudeildinni í kvöld. Leiknismenn byrjuðu leikinn vel en Hjörvar Daði Arnarsson var í stuði í marki Grindavíkur og varði nokkrum sinnum vel.

Rúnar Ingi Eysteinsson var nálægt því að koma Grindvíkingum yfir undir lok fyrri hálfleiks en Ólafur Íshólm Ólafsson varði frábærlega frá honum. Rafael Victor átti síðan skalla strax í kjölfarið en Ólafur aftur vel á verði.

Rúnar Ingi kom síðan Grindvíkingum yfir eftir undirbúning Gunnleifs Orra Gunnleifssonar.

Fleiri mörk urðu ekki skoruð og sterkur sigur Grindavíkur staðreynd. Leiknir er í 8. sæti með 19 stig, tveimur stigum á undan Grindavík sem er í sætinu fyrir neðan.