Lengjudeildin: Tvö rauð í sigri Þróttar í toppslagnum

Þróttur fékk Aftureldingu í heimsókn í ótrúlegum leik í Lengjudeildinni í kvöld.

Kári Kristjánsson kom Þrótturum yfir með marki úr vítaspyrnu. Stuttu síðar sauð upp úr og Enes Cogic aðstoðarþjálfari Aftureldingar fékk að líta rauða spjaldið.

Aron Snær Ingason bætti síðan öðru marki Þróttar við þegar hann skoraði úr þröngu færi.

Vont versnaði fyrir Aftureldingu þegar Andi Hoti var rekinn af velli með rautt spjald fyrir að brjóta á Erni Braga Hinrikssyni þegar hann var að sleppa í gegn.

Aron Snær bætti síðan við sínu öðru marki og þriðja marki Þróttar undir lok fyrri hálfleiks.

Örn Bragi gerði síðan svo gott sem út um leikinn snemma í seinni hálfleik þegar hann skoraði fjórða mark Þróttar. Trausti Þráinsson skoraði sárabótamark fyrir Aftureldingu undir lokin en nær komust þeir ekki.

Þróttur er á toppnum með 33 stig, jafn mörg stig og Fylkir en Afturelding er í 3. sæti með 31 stig.