Lengjudeildin: Theodór Ingi með tvennu í endurkomusigri Fylkis

Fylkir vann magnaðan endurkomusigur á Völsungi í Árbæ í kvöld. Elvar Baldvinsson fékk fyrsta færi leiksins fyrir gestina en skotið ekki nægilega gott.

Gestirnir náðu forystunni strax í upphafi seinni hálfleiks þegar Elfar Árni Aðalsteinsson skoraði eftir mikinn vandræðagang í vörn Fylkismanna.

Hann var nálægt því að bæta öðru marki við stuttu síðar en Ólafur Kristófer Helgason varði í horn.

Fylkismenn jöfnuðu metin þegar Theodór Ingi Óskarsson skoraði eftir að hafa fengið nægan tíma til að athafna sig inn í teignum. Hlynur Sævar Jónsson kom síðan Fylki yfir strax í kjölfarið eftir keimlíka sókn.

Theodór Ingi innsiglaði sigur Fylkis þegar hann skoraði í blálokin á opið markið eftir slæm mistök í vörn Völsungs.

Fylkir er á toppnum eins og er með 33 stig eftir 16 umferðir en Völsungur er í næst neðsta sæti með 11 stig.