Besta deild kvenna: FH tapaði dýrmætum stigum í titilbaráttunni

FH tapaði dýrmætum stigum í titilbaráttunni í Bestu deild kvenna þegar Valur jafnaði undir lok leiks í 2-2 jafntefli liðanna á Hlíðarenda í dag.

Gestirnir úr Hafnarfirði byrjuðu af miklum krafti. Ingibjörg Magnúsdóttir þræddi boltann inn fyrir vörn Vals á Helenu Maree Errington sem lék fram hjá Tinnu Brá Magnúsdóttur í markinu og skoraði.

Vörn Vals var illa á verði en heimakonur voru aðeins tvær mínútur að svara. Þær fengu hornspyrnu eftir að hafa farið illa með dauðafæri og Sóley Edda Ingadóttir lét vaða beint á markið. Boltinn söng í netinu og alvöru Ólympíumark staðreynd.

Markaregninu var þó ekki lokið því FH komst aftur yfir nánast um leið. Helena fékk boltann rétt utan vítateigs, tók tvöföld skæri og renndi honum á Birnu Kristínu Björnsdóttur sem lét vaða í fjærhornið fram hjá hreyfingarlausri Tinnu.

Færin féllu á báða bóga í síðari hálfleik. Ragnheiður Þórunn Jónsdóttir átti skot í slána fyrir Val og Emma Hawkins fór illa með algert dauðafæri. Hinum megin þrumaði Helena aukaspyrnu í slána.

Annað mark lá í loftinu og það kom Valsmegin þegar skammt var eftir. Eftir innkast fékk Hawkins boltann, sneri af sér varnarmann og sendi á Sonju. Skot hennar fór af varnarmanni og þaðan til Lillýjar Rutar Hlynsdóttur sem klíndi boltanum í fjærhornið.

Valur nældi þar í gríðarlega mikilvægt stig í fallbaráttunni en niðurstaðan er grátleg fyrir FH sem kastaði frá sér tveimur stigum í titilbaráttunni. Valur er á botninum með 17 stig en FH í öðru sæti með 34 stig, tveimur stigum frá toppnum þegar ein umferð er eftir fyrir tvískiptingu deildarinnar.