Frederik tók 21 sekúndu í markspyrnuna - ÍA refsaði grimmilega

Dómarar byrja ekki að telja strax niður þegar boltinn fer úr leik og var Frederik búinn að fá góðan tíma til að stilla boltanum upp og framkvæma markspyrnuna áður en leiktöfin var dæmd.

Jónatan Ingi Jónsson, leikmaður Vals, var svekktur með niðurstöðuna eftir leik og vildi meina að Skagamenn hefðu líka verið að tefja í leiknum. Eins og fyrr segir skoraði ÍA ekki upp úr fyrri hornspyrnunni, en annað horn fylgdi á eftir og úr því kom jöfnunarmarkið.

„Ég hélt að þetta væri komið hérna undir lokin þegar við fáum markspyrnu. Ég vil ekki vera að benda á aðra en mér fannst línan ekki vera þannig að Elías (dómari leiksins) væri að fara að taka af okkur einhverja markspyrnu og breyta henni í horn miðað við hvernig Árni (Marinó Einarsson, markvörður ÍA) var búinn að haga sér hérna allan leikinn og þeir búnir að taka tíma í allt. Mér fannst mjög skrítin lína þá að fara að dæma einhverja hornspyrnu en burt séð frá því eigum við að geta varist hornspyrnum," sagði Jónatan við Fótbolta.net eftir leikinn.

Miðað við útsendingu Sýn Sport fór boltinn út fyrir völlinn á 93:09, Elías dómari flautaði svo í kjölfarið og lét Frederik vita af því að hann væri byrjaður að telja og á 93:30, áður en Frederik spyrnti í boltann, dæmdi Elías leiktöf. Þá mátti heyra óánægju úr stúkunni, en Valsarar á vellinum, aðrir en Frederik, sýndu lítil viðbrögð. Markmannsþjálfarinn Emil Alexander Larsen fékk að líta rauða spjaldið fyrir sín mótmæli á hliðarlínunni.

Fréttamaður skoðaði markspyrnu frá Árna fyrr í leiknum og tók hann í það skiptið jafn langan tíma og Frederik í umræddu atviki í að framkvæma spyrnuna, en þá var ekkert dæmt. Í það skiptið fékk Árni ekki aðvörun frá dómara leiksins.

Valur varð af tveimur stigum sem svo gott sem fer út um vonir Valsara um sæti í efri hluta deildarinnar þegar deildinni verður skipt í efri og neðri hluta eftir næstu umferð.