Leikmaður 2. umferðar: Viktor Segatta
Viktor Smári Segatta, framherji ÍR, skoraði fimm mörk í 8-1 sigri liðsins gegn Völsungi í 2. deildinni um helgina.
Viktor Smári er leikmaður umferðarinnar í 2. deildinni hér á Fótbolta.net og er nú markahæstur í deildinni eftir fyrstu tvær umferðirnar.
„Þetta kemur svosum ekki á óvart. Ég held að það hafi ekki verið oft sem einhver hefur skorað fimm mörk og ekki verið valinn,“ sagði Viktor Smári við Fótbolta.net í dag.
Viktor Smári segir að góð byrjun hafi orðið til þess að ÍR-ingar náðu að vinna svona stóran sigur og segir hann Húsvíkinga einfaldlega hafa gefist upp.
„Þetta var góður liðsandi hjá okkur og þeir voru bara hættir. Þeir fá klaufalegt mark á sig í byrjun og lenda í smá sjokki, og við náum að koma inn tveimur mörkum fljótlega eftir það. Svo fáum við tiltölulega ódýrt víti og þá er staðan orðin 4-0, þeir ná aðeins að klóra í bakkann en síðan mætum við aftur inn í seinni hálfleikinn af krafti og klárum þetta bara,“ bætti Viktor við.
ÍR er með fjögur stig eftir fyrstu tvær umferðirnar, en liðið gerði jafntefli við Fjarðabyggð í fyrstu umferð. Viktor Smári er sáttur við uppskeruna en viðurkennir að liðið hefði viljað taka stigin þrjú gegn Fjarðabyggð.
„Þetta er alveg ásættanlegt. Við hefðum auðvitað viljað fá þrjú stig á móti Fjarðabyggð líka, en þetta er bara eins og þetta er og við höldum bara áfram á sömu braut,“ sagði Viktor.
ÍR sló erkifjendur sína í Leikni úr leik í 64-liða úrslitum Borgunarbikarsins og viðurkennir Viktor að það hafi verið gaman að senda erkifjendurna heim.
„Það er ekki margt skemmtilegara en að vinna Leikni,“ sagði Viktor, sem segir að ÍR-ingar ætli að hafa gaman af bikarkeppninni, en liðið mætir Aftureldingu í næstu umferð.
„Við mætum bara í næsta leik jafn vel stemmdir og við mættum í Leiknisleikinn, og ætlum bara að sjá hvað við getum. Þetta eru aukaleikir fyrir okkur, bara skemmtilegt.“
Viktor segir að ÍR-ingar ætli sér upp í 1. deildina á ný: „Ef við spilum eins og menn, þá eigum við að gera það.“
Sjá einnig:
Leikmaður 1. umferðar: Alexander Aron Davorsson
Stöðutaflan
L | U | J | T | ms: | mf: | mun | Stig | ||
---|---|---|---|---|---|---|---|---|---|
0 | 0 | 0 | 0 | 0 | 0 | 0 | 0 | 0 |
Athugasemdir