Flestir fjölmiðlar leggja áherslu á að Íslands sé langsmæsta þjóðin sem nokkurn tíma hefur komist í lokakeppni heimsmeistaramóts. Til að mynda talar breska dagblaðið Daily Mail um „ótrúlegt afrek“ þessarar litlu þjóðar.

Norrænu miðlarnir samgleðjast okkur Íslendingum og eru margir hverjir steinhissa.

„Það er algjörlega klikkað að smáþjóð eins og Ísland geti afrekað þetta. Það er ekki annað hægt en að taka að ofan og dást af Íslandi,“ sagði Kjetil Rekdal, norskur sérfræðingur hjá Eurosport, en þetta er haft eftir honum í Verdens Gang.

„Í mörg ár hefur Ísland verið smáþjóð í knattspyrnu en með 2-0 sigrinum gegn Kósóvó hefur þessi eyja með 335,000 íbúa tryggt sér sæti á HM í Rússlandi í sumar,“ sagði í umfjöllun hins danska Ekstra Bladet. Líkt og sönnum Dönum sæmir sagði blaðamaður að leikurinn hefði verið slakur og að mark Gylfa Þórs Sigurðssonar hafi komið upp úr engu.

Í umfjöllun sænska dagblaðsins Aftonbladet segir að Ísland haldi áfram að skrá sig á spjöld sögunnar, jafnvel þótt Lars Lagerback sé ekki lengur landsliðsþjálfari. Það virðist koma Svíum á óvart að Ísland hafi haldið áfram sinni vegferð án Lars.

Sjálfsagt munu fjölmiðlar halda áfram að fjalla um afrek Íslands á næstu dögum.