Langþráður sigur hjá Stefáni - Daníel Tristan, Guðlaugur Victor og Logi í tapliðum

Hannover hafði átt erfitt uppdráttar að undanförnu og ekki unnið leik síðan í september.

Liðið komst hins vegar aftur á sigurbraut í dag, en Stefán var á sínum stað í byrjunarliðinu.

Hannover var 1-0 undir í hálfleik þegar Stefán fór af velli, en félagar hans sneru leiknum sér í vil í síðari hálfleik með tveimur mörkum á aðeins sjö mínútum.

Með sigrinum fór Hannover upp í 12. sæti deildarinnar með ellefu stig.

Guðlaugur Victor Pálsson var í byrjunarliði Horsens sem tapaði 1-0 fyrir Viborg í dönsku úrvalsdeildinni. Hann fór af velli á 77. mínútu, en Horsens situr í sjöunda sæti með sextán stig.

Daníel Tristan Guðjohnsen kom inn af varamannabekknum hjá Malmö sem tapaði 2-1 fyrir Hammarby. Malmö er í sjöunda sæti deildarinnar með 40 stig.

Bjarni Mark Antonsson og Oskar Sverrisson voru báðir í byrjunarliði Trelleborg sem vann 2-1 sigur á Laholms í næstsíðustu umferð sænsku C-deildarinnar.

Trelleborg hefur þegar tryggt sér efsta sæti deildarinnar og þar með sæti í B-deildinni á næsta tímabili.

Logi Tómasson var í liði Samsunspor sem steinlá 5-2 fyrir Basaksehir í tyrknesku úrvalsdeildinni. Samsunspor hefur byrjað tímabilið skelfilega og situr í næstneðsta sæti með aðeins fjögur stig eftir tíu leiki.