Það er allt kolvitlaust á Ítalíu eftir leik Lazio og Milan í gær en Christian Pulisic leikmaður Milan hefur m.a. fengið mjög ljótar líflátshótanir.
Milan vann leikinn 1-0 en Noah Okafor skoraði eina mark leiksins þegar skammt var til leiksloka.
Þetta var erfiður róður fyrir Lazio en Luca Pellegrini var rekinn af velli eftir tæplega klukkutíma leik og í uppbótatíma fengu Adam Marusic og Matteo Guendouzi einnig að líta rauða spjaldið.
Mikil reiði hefur myndast og hefur Pulisic fengið að kenna á því. Undir lok leiksins ætlaði Guendouzi að skýla boltanum útaf þar sem leikmaður Lazio lá meiddur á vellinum en Pulisic sá það ekki og náði í boltann og ætlaði að bruna upp völlinn.
Guendouzi reif Pulisic niður og fékk að líta rauða spjaldið en margir hafa gagnrýnt dómarann fyrir frammistöðu sína í leiknum. Ítalskir fjölmiðlar greina frá því að hann verði settur í kælingu í mánuð.