Tindastóll tapaði 8-2 gegn Keflavík á heimavelli í dag en fyrirliðinn Bryndís Rut Haraldsdóttir var hreinskilin eftir leik og sagði liðið reynslulítið og hafi átt erfitt með að bregðast við breytingum gestanna í síðari hálfleik.
„Fyrstu viðbrögð eru bara aðeins að horfa yfir leikinn. Mér fannst fyrri hálfleikurinn bara allt í lagi. Við brugðumst alveg frekar vel varnarlega við þeim þar.“
Lestu um leikinn: Tindastóll 2 - 8 Keflavík
Keflavík tók yfir leikinn í seinni hálfleik og Bryndís segir liðið hafa lent í vandræðum eftir taktískar breytingar hjá Keflavík.
„Svo kemur seinni hálfleikur og mér fannst bara sniðugt hjá þjálfaranum, breytir um kerfið og tekur okkur svolítið úr jafnvægi og við bara bregðumst ekki nógu vel við að mínu mati. Við kannski, ég veit ekki hvort maður eigi að segja það, það er pínu reynsluleysi hjá okkur að geta ekki bara brugðist við þessi og það sést svolítið þarna.“
Tindastóll er með ungt og breytt lið frá síðasta tímabili og viðurkennir Bryndís að undirbúningurinn hafi haft áhrif.
„Stemmingin í hópnum er nú alveg búin að vera upp og niður, ég get alveg verið hreinskilin. Bara út frá því að undirbúningstímabilið var erfitt. Ég held að fólk hafi nú alveg séð það að við drógum okkur úr lengjubikarnum, það setur alveg smá toll á þetta. Við höfum fengið fáa æfingaleiki og sást bara aðeins í dag, viðurkenni það alveg.“
Hún leggur þó áherslu á jákvæðu hliðarnar.
„Ungir leikmenn að fá sénsa hérna og maður getur ekki annað en horft á það jákvæða í því. Maður vill að þær fái sitt platform og fái að taka skref hérna.“
Tindastóll missti stóran hluta liðsins frá síðasta tímabili og segir Bryndís mikilvægt að fá inn fleiri leikmenn.
„Hvað ætli við höfum misst marga leikmenn frá því í fyrra, 12 eða eitthvað. Það er allavega eiginlega bara heilt byrjunarlið sko þannig að mér finnst svolítið crusial að fá inn einhverja leikmenn í staðinn.“
„Við þurfum breidd og það verður bara gaman að sjá þessa tvo erlendu leikmenn þegar þeir koma sko.“
Þrátt fyrir erfiða byrjun segir Bryndís markmið liðsins skýr.
„Ég segi að okkar markmið er að halda okkur í deildinni sko. Ég er bara að vera raunsæ og raunhæf og segja þetta eins og það er.“
„Það voru einhverjar yfirlýsingar í haust að við ætluðum upp í efstu deild en eins og fólk veit eða hefur heyrt þá hefur náttúrulega bara ýmislegt gengið á í vetur, þjálfaravesen og ýmislegt sko.“
„Reyna að halda uppbyggingu áfram hjá Tindastól af því að það er að koma upp hópur og ég vill sjá okkur vera í lengjudeildinni áfram allavega.“
