Ítalía: Markaveislan heldur áfram

Sassuolo tók á móti Fiorentina í fyrri leik dagsins og náði Armand Laurienté forystunni fyrir heimamenn í opnum og skemmtilegum leik. David de Gea leit ekki vel út á milli stanganna en liðsfélagar hans björguðu málunum með mikilli markaskorun.

Mateo Pellegrino jafnaði fyrir Fiorentina í uppbótartíma fyrri hálfleiks áður en Svíinn ungi Alieu Njie kom gestunum yfir eftir frábært einstaklingsframtak.

Laurienté skoraði annað mark til að jafna metin en gestirnir frá Flórens voru talsvert hættulegri aðilinn og lönduðu að lokum verðskulduðum sigri þökk sé mörkum frá Franco Mastantuono og Victor Valdepenas á lokakaflanum.

Lokatölur 2-4 og eru liðin jöfn með 8 stig eftir 10 umferðir. Þetta er annar heimaleikurinn í röð sem Sassuolo tapar með þessari markatölu.

Parma kom öllum á óvart í kvöldleiknum og skóp þriggja marka sigur gegn bitlausum lærlingum Maurizio Sarri sem nýttu ekki færin sín.

Atalanta var sterkara liðið allan leikinn og skapaði frábær marktækifæri, en boltinn rataði ekki í netið. Nenad Krstovic og Charles De Ketelaere klúðruðu dauðafærum á meðan gestirnir frá Parma nýttu nánast öll hálffærin sín.

Giovanni Fabbian skoraði með skalla eftir hornspyrnu undir lok fyrri hálfleiks áður en Davide Zappacosta setti boltann í eigið net eftir fyrirgjöf El Bilal Touré snemma í síðari hálfleik. 18 ára gamall Simone Lontani innsiglaði svo sigur Parma með afar snyrtilegu marki á 58. mínútu.

Atalanta tókst ekki að minnka muninn þrátt fyrir góðar tilraunir, svo lokatölur urðu óvænt 0-3.

Atalanta er með 11 stig eftir slæma byrjun á tímabilinu, þremur stigum meira heldur en Parma sem var aðeins að vinna sinn annan deildarleik á tímabilinu.

Sassuolo 2 - 4 Fiorentina
1-0 Armand Lauriente ('25 )
1-1 Mateo Pellegrino ('45+2 )
1-2 Alieu Njie ('50 )
2-2 Armand Lauriente ('65 )
2-3 Franco Mastantuono ('79 )
2-4 Victor Valdepenas ('92 )

Atalanta 0 - 3 Parma
0-1 Giovanni Fabbian ('41 )
0-2 Davide Zappacosta ('47 , sjálfsmark)
0-3 Simone Lontani ('58 )