Emil: Stormur og svart ský yfir Stjörnunni

„Ég held það sé hollt fyrir mig að prófa að fara annað. Stjarnan gaf mér fullt, ég fann minn sjálfstraust hjá Stjörnunni, en mér finnst kominn tími fyrir mig að prófa eitthvað nýtt og fara annað," segir Emil.

Hvernig gerir þú upp tímabilið 2026 hjá Stjörnunni?

„Skrautlegt, mjög skrautlegt. Það er margt sem spilar inn í, en heilt yfir er þetta mikill lærdómur. Þetta er rosalega lærdómsríkt tímabil fyrir alla; fyrir Stjörnuna, fyrir mig, fyrir aðra leikmenn og alla sem koma nálægt Stjörnunni."

Ertu svekktur hvernig málin voru höndluð varðandi þjálfaramál?

„Ég held að flestir sjái það að þau mál voru ekkert endilega höndluð rétt, en það var gert eins og það var gert. Mér fannst þetta kannski ekki rétti tímapunkturinn til að gera þjálfaraskipti. Allt í góðu með það, en í kjölfar þess kemur ákveðinn stormur yfir klúbbinn og svart ský sem lá yfir klúbbnum í einhvern tíma."

„En mér líður eins og það sé að birta til með innkomu Rúnars Páls og Halldórs Orra, og svo er Gaui Bald kominn í þetta líka, allt glerharðir Stjörnumenn og Garðbæingar. Það eru bjartir tímar framundan hjá Stjörnunni."

Jökull Elísabetarson var látinn fara í júní og um tveimur mánuðum síðar var Jón Þór Hauksson látinn fara. Stjarnan náði í lokaumferðinni að komast upp í 7. sætið, efsta sæti neðri hlutans, en liðinu var spáð 3. sæti fyrir mót.

Tek öllu lífinu sem lærdóm
Þú skorar tíu mörk í deildinni, fjögur í bikar og þrjú í Evrópu. Ert þú persónulega sáttur við tímabilið eða hugsar þú að þú hefðir getað gert betur?

„Það er alltaf hægt að gera betur, engin spurning, en ég er svo einfaldur að ég horfi á þetta sem lærdóm og tek öllu í lífinu sem lærdóm. Ég reyni að læra af því sem ég get lært af á þessu tímabili," segir framherjinn sem hefur nú nýjan kafla í Úlfarsárdal.