Þýskaland: Mainz lagði Frankfurt

Mainz tók á móti Eintracht Frankfurt í síðasta leik helgarinnar í þýska boltanum.

Fresta þurfti upphafsflautinu vegna mótmæla stuðningsmanna sem köstuðu blysum á völlinn. Þeir eru ósáttir með að spila þurfi á mánudagskvöldi, ákvörðun sem var tekin til að aðstoða lið sem keppa á fimmtudagskvöldum í Evrópudeildinni og fá hærri sjónvarpstekjur. Frankfurt lagði Arsenal að velli síðasta fimmtudag.

Gestirnir frá Frankfurt áttu góðan fyrri hálfleik og leiddu 0-1 þökk sé marki frá Martin Hinteregger. Liðsfélagi hans Dominik Kohr fékk beint rautt spjald fyrir leikhlé þegar hann braut af sér sem aftasti varnarmaður.

Karim Onisiwo jafnaði í upphafi síðari hálfleiks en hann var afar heppinn að boltinn hafnaði í netinu. Hann fékk skot frá Jeremiah St. Juste í sig og breytti knötturinn um stefnu. Onisiwo lagði svo upp sigurmarkið fyrir Adam Szalai á 69. mínútu.

Þetta var annar sigur Mainz í röð og er liðið með 15 stig eftir 13 umferðir. Þriðji tapleikur Frankfurt í röð í deildinni staðreynd og er liðið um miðja deild, með 17 stig.