Níu sem gætu fært sig um set eftir HM

Ayyoub Bouaddi (Marokkó, Lille): Liðsfélagi Hákonar Arnars hjá Lille heillaði með Marokkó á HM. Þrátt fyrir að vera aðeins átján ára stýrði hann miðjunni vel og eru stórlið á borð við Chelsea, Man City, Real Madrid, Barcelona og PSG á eftir honum.

Yan Diomande (Fílabeinsströndin, RB Leipzig): Þessi nítján ára kantmaður hefur verið undir smásjá Liverpool í þó nokkurn tíma. Félagið var ekki reiðubúið að greiða 100 milljón punda verðmiðan sem settur var á hann en PSG og Man Utd hafa jafnframt áhuga á honum og vill hann ólmur fara til Frakklands.

Djed Spence (England, Tottenham): Grímuklæddi Spence endaði mótið frábærlega með sterkri innkomu gegn Noregi og fínasta leik gegn heimsmeisturum Argentínu. Inter er með bakvörðinn í sigtinu en Liverpool og Everton hafa sömuleiðis áhuga á honum.

John Stones (England, án félags): Stones varð fyrsti leikmaður í sögu Englands til að spila með liðinu á HM án þess að vera samningsbundinn félagi. Eftir farsælan tíma hjá City var ekki framlengt við hann og er hann skotmark Juventus og Inter. Þá hefur Leeds jafnframt áhuga á að fá hann en hann er fæddur og uppalinn í Jórðvíkurskíri og fór í gegnum akademíu Barnsley.

Antonee Robinson (Bandaríkin, Fulham): Var lykilmaður í spræku liði Bandaríkjamanna. Hefur staðið sig vel með Fulham síðustu ár og hefur Man Utd sýnt bakverðinum áhuga.

Julian Alvarez (Argentína, Atletico Madrid): Lykilmaður í liði Argentínu sem mætir Spáni í úrslitaleiknum á sunnudag. Hefur blómstrað hjá Atletico síðustu tvö ár. Félagið leggur allt kapp á að halda honum en Alvarez er eitt helsta skotmark Englandsmeistara Arsenal.

Mikel Oyarzabal (Spánn, Real Sociedad): Líður vel hjá uppeldisklúbbnum þar sem hann er aðalmaðurinn. Greint hefur verið frá því að hann sé með klásúlu í samningi sínum sem gerir honum kleift að fara fyrir 65 milljónir punda. Juventus Arsenal og Barcelona eru öll með þann spænska á blaði.

Zion Suzuki (Parma, Japan): Var frábær í marki Japans á mótinu sem duttu úr leik gegn Brasilíu í 32-liða úrslitum. Newcastle og Leeds eru bæði með hann á óskalistanum.

Bradley Barcola (Frakkland, PSG): Stór hluti af ógnvænlegri sóknarlínu Frakka, byrjaði fjóra leiki og skoraði tvö mörk á mótinu. Hefur verið orðaður við Börsunga, Arsenal og Liverpool.