Víkingar áttu góða ferð suður með sjó þegar þeir heimsóttu Keflavík á HS Orku völlinn í 5. umferð Bestu deild karla í kvöld.
Lestu um leikinn: Keflavík 1 - 3 Víkingur R.
„Erfiður leikur, erfiðar aðstæður" sagði Sölvi Geir Ottesen þjálfari Víkinga eftir sigurinn í kvöld.
„Mér fannst við ekkert sérstakir í dag, ef ég á að vera hreinskilinn. Mér fannst þetta þungt og hægt þannig ég er bara sáttur fara með sigur hérna"
Víkingar áttu í brasi með Keflvíkinga í seinni hálfleik en þeir náðu á köflum að þrýsta Víkingum vel niður.
„Þeir voru flottir í dag. Þeir voru tilbúnir að slást og voru mikið yfir í barningnum"
„Mér fannst við aðeins þegar það kom að 2-1 markinu okkar, þá fannst mér við aðeins vera að banka á þá eftir skiptingarnar. Þá kom aðeins meiri stjórn á leiknum. Við fórum að þora aðeins að spila í gegnum miðjuna og finna sendingarnar í gegnum miðjuna og þaðan út á kantinn"
„Þetta var ekki góður leikur og Keflavík gerði okkur virkilega erfitt fyrir og bara sáttur með að taka þrjú stig"
Sölvi Geir var búin að nota allar skiptingarnar sínar þegar tæpur klukkutími var liðin af leiknum.
„Ástæðan fyrir skiptingunum var að breyta til. Ég vildi fá eitthvað meira líf í þetta en síðan er það bara reynsluleysi hjá mér sem þjálfara að gleyma að ég var búin að skipta markmanninum líka inn á. Ég hélt ég ætti eina eftir inni"
„Ég ætlaði ekki að vera búin að klára þær þarna en maður lærir bara af þessu"
Aron Elís Þrándarson spilaði sínar fyrstu 90 mínútur í kvöld eftir krossbandaslit.
„Æðislegt að fá hann til baka. Það voru fleiri, Davíð Atla er núna að líka að fá 90 mínútur þannig það er bara gott að geta dreift álaginu og mínútum á milli leikmanna. Ég er bara virkilega sáttur með þeirra framlag í dag, þeir voru að berjast fyrir sínu í dag og bara mikilvægt að fá sem flesta með mínútur í staðin fyrir að þegar það kemur að törninni þar sem við þurfum að rótera að menn séu allavega búnir að spila einhverjar mínútur" sagði Sölvi Geir Ottesen.
| Lið | L | U | J | T | Mörk | mun | Stig |
|---|---|---|---|---|---|---|---|
| 1. Víkingur R. | 8 | 7 | 1 | 0 | 26 - 4 | +22 | 22 |
| 2. KR | 8 | 6 | 1 | 1 | 30 - 19 | +11 | 19 |
| 3. Fram | 8 | 5 | 2 | 1 | 21 - 13 | +8 | 17 |
| 4. Breiðablik | 8 | 4 | 3 | 1 | 19 - 11 | +8 | 15 |
| 5. Valur | 8 | 5 | 0 | 3 | 17 - 14 | +3 | 15 |
| 6. Keflavík | 8 | 3 | 2 | 3 | 11 - 12 | -1 | 11 |
| 7. KA | 8 | 3 | 1 | 4 | 9 - 10 | -1 | 10 |
| 8. ÍA | 8 | 2 | 3 | 3 | 11 - 16 | -5 | 9 |
| 9. Stjarnan | 8 | 2 | 1 | 5 | 14 - 18 | -4 | 7 |
| 10. Þór | 8 | 2 | 0 | 6 | 6 - 20 | -14 | 6 |
| 11. FH | 8 | 0 | 2 | 6 | 12 - 25 | -13 | 2 |
| 12. ÍBV | 8 | 0 | 2 | 6 | 8 - 22 | -14 | 2 |
