| mið 06.maí 2020 18:00 Mynd: Fótbolti.net - Hafliði Breiðfjörð |
|
Orri Kjartans: Allt var á góðu skriði - Stefni alla leið
Orri Hrafn Kjartansson er á mála hjá Heerenveen. Orri hafði ekki leikið mótsleik með meistaraflokki Fylkis áður en hollenska félagið krækti í hann.
Orri er átján ára gamall og er hann hluti af feykilega öflugu U19 ára landsliði Íslands. Fótbolti.net hafði samband við Orra í vikunni og spurði hann út í Heerenveen og hans markmið hjá félaginu.
Ég mun alltaf vera þakklátur fyrir allt sem þau gerðu til að styðja mig við minn draum, bæði foreldrum og systkinum.
Í dag hef ég lært að beina tilfinningunum í rétta átt til að hjálpa mér við minn leik.
Þetta hjálpaði mér alveg gríðarlega mikið, að hafa einhvern að í svona nýju umhverfi.
Ég var nokkuð fljótur að kveikja á hollenskunni og fékk hollensku kennslu tvisvar til þrisvar í viku.
Ég hef mætt á æfingar með aðalliðinu og allt á góðu skriði áður en veiran blossaði upp.
Þú færð að kynnast einstökum persónuleikum bæði þjálfara og leikmanna og sumir leikmenn eru klárlega skrautlegri en aðrir.
Ég fór á æfingu 13. mars og svo sem ekkert að frétta. Svo allt í einu seinni partinn er ég að bóka flug heim í óvissan tíma.
Hvað mig varðar þá er ég bara að æfa sjálfur og halda mér í formi eins vel og ég get miðað við aðstæður.
Ég sá strax að hollenski boltinn og allt tengt honum hentaði mér miklu betur og eftir fyrstu reynsluna þar varð ekkert aftur snúið
Orri stefnir alla leið og í aðalliðshópinn hjá Heerenveen.
Ég ætla að halda áfram mínu striki og halda áfram að spila vel og sanna mig.
Ég man að í einni ferð sömdu tveir leikmenn liðsins lag um sig sjálfa með alveg fáránlegum texta...
...það endaði svo á því að lagið var sungið af öllum leikmönnum liðsins eftir sigur í síðasta leik sem þýddi að við vorum komnir áfram í milliriðil í undankeppni EM U17.
En þrátt fyrir það er alltaf mjög mikill agi og einbeiting í hópnum og menn alltaf einbeittir á aðalverkefninu sem er góð úrslit, annars er alltaf stutt í gamanið og sprellið inn á milli þegar það á vel við.
„Mitt markmið er fara alla leið. Í dag er ég að spila fyrir Heerenveen og markmiðið er að sjálfsögðu að komast í aðalliðshópinn en það er að sjálfsögðu undir mér komið."
Íslandsmeistari í áhaldafimleikum
Við byrjum þetta samt í Árbænum og á fyrstu skrefunum í boltanum. Hvenær og af hverju byrjaði Orri að æfa fótbolta?
„Ég byrjaði að mæta á æfingar fimm ára, í 8. flokknum hjá Fylki. Pabbi spilaði fótbolta hjá ÍR og fékk mig á fyrstu æfingarnar en áhuginn var alltaf til staðar hjá mér og eftir það varð ekkert aftur snúið," sagði Orri við Fótbolta.net.
Orri segir frá því í 'hinni hliðinni' að hann hafi á sínum tíma unnið til Íslandsmeistaratitils í áhaldafimleikum. Hvernig var að æfa bæði fótbolta og fimleika?
„Mamma og pabbi hafa alltaf hjálpað mér með allt sem þau geta til að ég nái því sem ég ætla mér í lífinu. Þau stungu upp á því að fara í fimleika. Þar gat ég fengið frábæra þjálfun og bætt styrk, jafnvægi, aga og fínhreyfingar sem ekki er eins auðvelt að þjálfa á fótboltavellinum."
„Ég byrjaði um níu ára á fyrstu æfingunum og mér líkaði bara mjög vel við mig í fimleikunum. Svo var ég byrjaður að taka þátt í keppnum og farinn að æfa eins og fimleikamaður."
Hvenær tók Orri ákvörðun um að hætta í fimleikum og af hverju?
„Um það leyti sem ég er kominn í 5. flokk og orðinn tólf ára. Þá er ég farinn að æfa samtals níu sinnum í viku og fann það sjálfur að það var kominn tími á að stoppa, enda áhuginn mun meiri fyrir fótboltanum og fimleikarnir voru í rauninni bara til að bæta mig sem knattspyrnumann. Það hefur skilað sér mjög vel."
Úr stúkunni og í klefann
Lék Orri með Fylki upp alla yngri flokkana?
„Ég er Fylkismaður í húð og hár og fór upp alla yngri flokkana þar. Þar fékk ég að vaxa og dafna með hjálp frábærra þjálfara og starfsmanna félagsins."
„Ég þjálfaði 7. flokk í tvö tímabil og fór úr því að vera í stúkunni að styðja mitt lið í efstu deild í að sitja á bekknum og í klefanum. Alltaf góð stemning og liðsheild í Árbænum."
Náð að beisla skapið að einhverju leyti
Aftur er vitnað í 'hina hliðina' því Orri segir þar frá því þegar hann fékk að líta rauða spjaldið í tvígang þegar hann var sex ára á Norðurálsmótinu þegar ekki átti að vera hægt að fá rautt spjald. Hvernig hefur Orri unnið í að hemja skapið?
„Ég hef náð góðum tökum á því. Mamma og pabbi hugguðu mig ófáum sinnum í gegnum yngri flokkana en í dag hef ég lært að beina tilfinningunum í rétta átt til að hjálpa mér við minn leik."
„Enda á maður aldrei að sætta sig við tap og ég nota skapið í að gera allt sem ég get til að koma í veg fyrir það. En ég hef ennþá svakalegt skap og ég get alveg viðurkennt að ég get ennþá tárast eftir tapleik."
Fór til Hollands án þess að spila í Pepsi
Orri var viðloðinn hópinn hjá Fylki sumarið 2018. Hvernig var að koma inn í hópinn?
„Þetta gerðist allt mjög hratt. Ég var kallaður í hóp í leik í Reykjavíkurmótinu í undanúrslitum á móti KR. Eftir það fór ég að mæta á æfingar og fljótt var ég eingöngu að æfa með meistaraflokknum."
„Það var ótrúlegt að æfa með leikmönnum sem þú hefur horft
á spila síðan þú varst 6 ára eins og Ásgeiri Berki, Albert Brynjari og Andrési Má bara til dæmis. En ég átti eftir að vera í hóp níu sinnum í Pepsi og í eina bikarleiknum gegn Stjörnunni."
„Ég var farinn til Hollands áður en tímabilið var einu sinni hálfnað og ég verð að viðurkenna að það var súrt að fá ekki að spila allavegana einn leik en svo varð bara því miður ekki."
Hollenski boltinn hentaði betur en sá enski
Orri semur við Heerenveen um mitt sumar 2018. Hver var undanfari þess að samið var við Heerenveen og voru önnur lið að skoða hann á þessum tíma?
„Ég fór fyrst á reynslu til Derby County og mánuði seinna til Heerenveen. Þetta var vorið 2017. Ég sá strax að hollenski boltinn og allt tengt honum hentaði mér miklu betur og eftir
fyrstu reynsluna þar varð ekkert aftur snúið, ég var staðráðinn í að þetta væri eitthvað sem ég væri að leita að."
„Félaginu leist vel á mig og vildi fá mig aftur um haustið. Þá gekk líka mjög vel og ég fer í þriðja sinn á reynslu vorið 2018. Eftir síðustu æfinguna tóku þeir mig inn og sögðu mér að þeir ætluðu að bjóða í mig og bjóða mér samning. Ég var hrikalega ánægður og stoltur og það kom ekkert annað til greina en að samþykkja."
Fjölskyldan studdi vel við Orra og flutti með honum út
Hvernig var fyrsti veturinn hjá Heerenveen og flutti fjölskyldan með Orra út?
„Ég flutti út í ágúst 2018 og bjó inni á hollenskri fjölskyldu í tvær vikur. Fjölskyldan var búin að ákveða að ef ég færi að þá kæmu þau með. Þau komu svo þarna tveimur vikum á eftir mér og þau fluttu aftur heim til Íslands bara núna í byrjun febrúar 2020."
„Ég mun alltaf vera þakklátur fyrir allt sem þau gerðu til að styðja mig við minn draum, bæði foreldrum og systkinum. Þetta hjálpaði mér alveg gríðarlega mikið, að hafa einhvern að í svona nýju umhverfi."
„Ég kom þarna inn í U17 ára liðið. Æfði og spilaði allt fyrsta tímabilið með þeim. Mér gekk mjög vel og fór að æfa inn á milli með u19 ára liðinu og fékk nokkrar mínútur með varaliðinu á fyrsta tímabilinu."
„Þetta fyrsta tímabil fór mest í það að koma sér fyrir, aðlagast strákunum og leikstílnum og að sjálfsögðu að bæta mig sem leikmann."
Hvernig var náminu háttað í Hollandi og hvernig gekk að læra hollenskuna?
„Ég var nokkuð fljótur að kveikja á hollenskunni og fékk hollensku kennslu tvisvar til þrisvar í viku. Auk þess sinnti ég fjarnámi en ég kunni vel á það vegna þess að ég var þegar búinn með slatta af áföngum áður en ég útskrifaðist úr grunnskóla."
Allt á góðu skriði fyrir heimsfaraldurinn
Hvernig var annað tímabil Orra hjá Heerenveen?
„Ég byrjaði nýtt tímabil sem leikmaður U19 liðsins og það byrjaði bara að krafti. Ég lenti svo á smá vegg þegar ég fékk heilahristing í fyrsta leik mótsins í september og missti af fyrstu sex vikunum í keppninni og tveimur æfingaleikjum með U19 landsliðinu."
„Ég spilaði minn fyrsta leik eftir meiðslin í 0-2 útisigri á PSV og spilaði 90 mínútur sem var virkilega sætt. Þetta var einmitt síðasti leikur fyrir riðilinn okkar í undankeppni EM með U19 landsliðinu þannig ég var mjög ánægður að ná heilum leik fyrir keppnina."
„Síðan þá hef ég spilað alla leikina í deildinni með U19 liði Heerenveen og spilað mjög vel. Ég hef mætt á æfingar með aðalliðinu og allt á góðu skriði áður en veiran blossaði upp."
Vonast til að byrja æfa sem fyrst
Hvernig var málum háttað þegar kom að heimsfaraldrinum? Er Orri á Íslandi?
„Ég fór á æfingu 13. mars og svo sem ekkert að frétta. Svo allt í einu seinni partinn er ég að bóka flug heim í óvissan tíma. Eins og einhverjir hafa eflaust séð var verið að enda tímabilið í Hollandi og ekkert spilað fyrr en 1. september."
„Þeir ætla samt að reyna að byrja æfingar eins fljótt og unnt er en það er enn allt í óvissu. Hvað mig varðar þá er ég bara að æfa sjálfur og halda mér í formi eins vel og ég get miðað við aðstæður. En vonandi fer að koma í ljós eitthvað með framhaldið."
Markmiðið að fara alla leið
Hvernig lítur framhaldið út? Hver eru markmið Orra hjá Heerenveen?
„Ég mun spila með U21 liði Heerenveen á næsta tímabili. Planið þeirra er að láta U21 liðið æfa á svipuðum tímum og aðalliðið og færa mikið á milli."
„Ég ætla að halda áfram mínu striki og halda áfram að spila vel og sanna mig. Mitt markmið er fara alla leið. Í dag er ég að spila fyrir Heerenveen og markmiðið er að sjálfsögðu að komast í aðalliðshópinn en það er að sjálfsögðu undir mér komið."
Sömdu lag um sig sjálfa með fáránlegum texta
Hvernig er að hitta landsliðsfélagana í yngri landsliðunum og er einhver ósögð saga?
„Það er alltaf geggjaður liðsandi og stemning í öllum landsliðsferðum. Þú færð að kynnast einstökum persónuleikum bæði þjálfara og leikmanna og sumir leikmenn eru klárlega skrautlegri en aðrir."
„Ég man að í einni ferð sömdu tveir leikmenn liðsins lag um sig sjálfa með alveg fáránlegum texta, það endaði svo á því að lagið var sungið af öllum leikmönnum liðsins eftir sigur í síðasta leik sem þýddi að við vorum komnir áfram í milliriðil í undankeppni EM U17."
„En þrátt fyrir það er alltaf mjög mikill agi og einbeiting í hópnum og menn alltaf einbeittir á aðalverkefnið sem er góð úrslit, annars er alltaf stutt í gamanið og sprellið inn á milli þegar það á vel við."
Gerði andstæðing alveg brjálaðan
Orri segir frá skemmtilegu atviki í 'hinni hliðinni' þegar andstæðingur hans fékk rautt spjald vegna Orra og sami andstæðingur ætlaði að ráðast á þjálfara Orra. Orri var að lokum beðinn um að rifja þetta atvik upp.
„Þetta átti sér stað fyrir nokkrum árum. Ég man bara að við vorum þrem eða fjórum mörkum yfir mjög snemma leiks og ég var búinn að fara þó nokkrum sinnum framhjá honum og hann var farinn að verða pirraður og ég tók vel eftir því á því hvernig hann lét og hvernig hann talaði við mig."
„Á endanum straujaði hann mig niður við hliðarlínuna og þjálfarinn minn varð alveg brjálaður. Þá missti leikmaðurinn það, hann fékk gult spjald fyrir brotið og missti svo hausinn í þokkabót. Hljóp að þjálfaranum okkar og fór með nokkur óviðeigandi orð."
„Hann var stoppaður og dreginn í sturtu með annað gult og rautt. Heyrðist nánast í honum þangað til hann var kominn inn í klefa," sagði Orri að lokum.
Sjá einnig:
Hin hliðin - Orri Kjartansson (Heerenveen)
