Sjáðu rauða spjaldið sem markvörður KR fékk og vakti furðu

Guy Smit markvörður KR fékk tvö gul spjöld með stuttu millibili, og þar með rautt, í 1-1 jafntefli gegn KA í gær.

Hollendingurinn hefur verið í brasi í síðustu leikjum Vesturbæjarliðsins og fékk gult spjald í gær fyrir að brjóta af sér fyrir utan teig.

KA-menn voru ekki sáttir þar sem þeir vildu að Twana Khalid Ahmed dómari myndi láta leikinn ganga áfram því Ásgeir Sigurgeirsson stóð upp og markið var autt. Í það minnsta vildu þeir annan lit á spjaldinu fyrst flautað var.

Stuttu seinna fékk Guy svo sitt annað gula spjald fyrir leiktöf, þrátt fyrir að hafa ekki tekið óvenku langan tíma í að taka markspyrnu.

„Við erum búnir að horfa aftur á þetta og þetta eru átta sekúndur sem að Smit tók sér í að taka spyrnuna. Ég hef aldrei á öllum mínum þjálfaraferli, eða sem knattspyrnuáhugamaður, séð markmann fá gult spjald fyrir að taka sér átta sekúndur í að taka markspyrnu," sagði Gregg Ryder þjálfari KR eftir leik.

KA nýtti sér liðsmuninn til að jafna leikinn í 1-1 og urðu það lokatölur.

Vísir hefur birt myndband af atvikinu og má sjá það hér að neðan.