Skilur eftir sig eitt stærsta skarð sem getur myndast

Fjallað hefur verið um það í vikunni að Víkingur er að selja færeyska varnarmanninn Gunnar Vatnhamar til danska félagsins Vejle.

Gunnar er úti í Sviss með Víkingum og verður með gegn Thun í forkeppni Evrópudeildarinnar í kvöld. Ekki er vitað nákvæmlega hvenær hann yfirgefur Víking en búist er við því að hann klári Evrópueinvígið.

Í Innkastinu var rætt um þessi tíðindi. „Hann er það mikilvægur fyrir þetta lið að maður myndi giska á að það sé hans vilji að taka þetta skref og próf eitthvað nýtt," segir Elvar Geir og telur að það hljóti að vera að Gunnar, sem er 31 árs, vilji færa sig um set.