Besta deild kvenna: FH-ingar á toppinn

FH endurheimti toppsæti Bestu deildar kvenna með 2-1 endurkomusigri á Þór/KA í Kaplakrika í dag, í lokaumferðinni fyrir tvískiptingu.

Hafnfirðingar eru í harðri titilbaráttu við Breiðablik og ekkert annað en sigur kom til greina gegn Akureyringum.

FH var betri aðilinn framan af en gestirnir nýttu sitt færi og komust yfir á 23. mínútu. Amalía Árnadóttir sendi fyrir frá hægri á Erin Flurey sem tók gott hlaup á fjærstöngina og stangaði boltann í netið.

Litlu munaði að Flurey tvöfaldaði forystuna á 35. mínútu. Hún hirti boltann af Deju Sandoval og reyndi að leika á Aldísi Guðlaugsdóttur en markvörðurinn lokaði vel á hana og skotið fór yfir.

Fimm mínútum síðar jafnaði FH. Hafrún Birna Helgadóttir fékk boltann eftir hornspyrnu og átti skot sem fór af varnarmanni og í netið.

Heimakonur sneru svo taflinu við á 58. mínútu. Andrea Rán Snæfeld Hauksdóttir sendi út á Ingibjörgu Magnúsdóttur sem færði sig inn á völlinn og lagði boltann í fjærhornið.

FH hélt forystunni og er aftur á toppnum með 37 stig, einu stigi meira en Breiðablik sem á leik til góða gegn Þrótti á morgun.

Þá tekur við einföld umferð í efri hlutanum þar sem hvert lið spilar fimm leiki. Það stefnir því í spennandi lokasprett í titilbaráttunni á næstu vikum.