„Ég er búinn að vera frá keppni í þrjár vikur eftir Kosóvó leikinn. Ég fór aðeins í ökklanum gegn Birmingham og er búinn að vera í meðhöndlun til að koma mér í gang aftur," sagði Aron við Fótbolta.net.

„Þetta hefur tekið lengri tíma en ég bjóst við en það er betra að ná sér góðum heldur en að gera eitthvað illt verra. Ég er kominn hingað til að koma mér í form og ná kannski tveimur mínútum í leik. Ég veit ekkert hvort ég spili. Ég er aðallega að koma mér í gang fyrir Cardiff."

Heimir Hallgrímsson, landsliðsjálfari, segir að ferðin til Katar sé til að verðlauna leikmenn fyrir að hafa tryggt sætið á HM í síðasta mánuði.

„Þetta er öðruvísi ferð. Heimir hefur komið inn á það að þetta er bónusferð fyrir að koma okkur á þennan stað. Það er loksins landsliðsverkefni þar sem er ekki allt udnir og úrslitaleikir eins og undanfarin tvö ár. Strákarnir eiga skilið að vera í smá hita, æfa, spila og golfa kannski smá. Þetta er öðruvísi ferð," sagði Aron.

Cardiff er í 3. sæti í Championship deildinni í augnablikinu, fjórum stigum á eftir toppliði Wolves. Aron er bjartsýnn á að Cardiff geti blandað sér í baráttuna um sæti í úrvalsdeildinni.

„Við erum með öflugt lið sem nær í úrslit. Þjálfarinn er reynslumikill og það er kraftur í þessum hóp. Það eru góðir möguleikar en ég veit hvernig þessi deild er. Það eru mörg lið sem eiga eftir að fara á skrið á meðan formið dettur niður hjá öðrum. Við þurfum að halda stöðugleika. Við höfum verið góiðr heima og ekki tapað þar. Það skiptir máli að vera góðir heima og reyna að ná 1-0 sigrum á útivelli. Staðan er fín og ég er spenntur fyrir þessu tímabili."

Hér að ofan má sjá viðtalið í heild sinni.