Guðmundur Þórarinsson kom inn á 77. mínútu er New York City FC heimsótti DC United í bandarísku MLS deildinni.

Leikurinn var einstefna frá fyrstu að síðustu mínútu þar sem heimamenn áttu ekki eina einustu marktilraun í leiknum.

Gestirnir frá New York áttu 19 tilraunir að marki en aðeins fjórar þeirra hittu rammann.

Þjálfari New York var svekktur að leikslokum og kvartaði undan því að hafa spilað gegn liði sem „varðist með ellefu leikmenn í eigin vítateig í 90 mínútur".

New York er í sjöunda sæti eftir hörmulega byrjun á tímabilinu, með 13 stig eftir 10 umferðir. Gummi og félagar voru búnir að vinna þrjá leiki í röð fyrir jafnteflið í dag.

Selfyssingurinn fjölhæfi hefur komið við sögu í fjórum af síðustu fimm leikjum liðsins.