Dejan Stankovic nýr þjálfari Sampdoria (Staðfest)

Giampaolo var rekinn eftir hrikalega byrjun á tímabilinu þar sem Samp er aðeins með tvö stig eftir átta umferðir. Samp er búið að tapa gegn liðum á borð við Spezia og Monza undanfarnar vikur og á gríðarlega mikilvægan leik við Bologna í kvöld.

Stankovic þekkir ítalska boltann vel eftir að hafa spilað fyrir Lazio og Inter sem leikmaður og verið aðstoðarþjálfari hjá Udinese.

Stankovic stýrði Rauðu stjörnunni frá Belgrad í þrjú ár og gerði góða hluti en sagði upp starfinu fyrr í haust. Hann hætti eftir að Rauða stjarnan var slegin úr leik af Maccabi Haifa í forkeppni Meistaradeildarinnar.

Stankovic er 44 ára gamall og fær samning út tímabilið. Claudio Ranieri og Roberto D'Aversa, sem hafa báðir stýrt Samp áður, voru einnig orðaðir við starfið.

Stankovic er Serbi og spilaði yfir 100 landsleiki fyrir þjóð sína.