England: Grátlegt tap Fulham gegn Wolves

Fulham þurfti að sætta sig við grátlegt tap í ensku úrvalsdeildinni í kvöld er liðið mætti Wolves á heimavelli.

Fulham var þremur stigum frá öruggu sæti fyrir leikinn í kvöld og þurfti því nauðsynlega á sigri að halda.

Wolves virtist hafa komist yfir undir lok fyrri hálfleiks þegar Willian Jose kom boltanum í netið.

VAR ákvað hins vegar að Daniel Podence hafi verið fyrir innan í uppbyggingunni og markið því tekið af.

Það var ekki fyrr en á 93. mínútu sem sigurmarkið kom en það gerði Adama Traore fyrir gestina í appelsínugulu.

Traore fékk sendingu inn fyrir vörn Fulham og tókst að skora þrátt fyrir að vera í virkilega þröngri stöðu.

Wolves lyfti sér upp í 12. sæti deildarinnar með sigrinum og er nú nánast algjörlega búið að bjarga sér frá falli. Fulham er enn í fallsæti og hefur leikið tveimur leikjum meira en Newcastle sem er sæti ofar.