Lið og leikmaður 3. umferðar - Sigurður Egill með fullt hús

Jóhann Þór Arnarsson skoraði tvö mörk fyrir HK á Ísafirði og kemst í lið umferðarinnar. Mörkin dugðu þó skammt fyrir hans menn.

Sigurður Egill Lárusson hefur verið í liði umferðarinnar í öllum þremur umferðunum en hann var maður leiksins í 3-0 sigri Þróttar gegn Völsungi á Húsavík. Aron Snær Ingason var meðal markaskorara Þróttar og þá er Sigurvin Ólafsson þjálfari umferðarinnar.

Víðir Freyr Ívarsson var maður leiksins þegar ÍR gerði 2-2 jafntefli við Grindavík. Hann skoraði fyrsta mark leiksins. Grímur Ingi Jakobsson skoraði eina mark leiksins af vítapunktinum þegar Grótta vann 1-0 útisigur gegn Ægi.

Bart Kooistra var með mark og stoðsendingu í 3-0 útisigri Aftureldingar gegn Leikni. Axel Óskar Andrésson var flottur í vörninni í fyrsta sigri Mosfellinga og Arnar Daði Jóhannesson er einnig í úrvalsliðinu.

Bragi Karl Bjarkason skoraði fyrra mark Njarðvíkur í 2-0 sigri gegn Fylki í stórleik umferðarinnar. Eiður Aron Sigurbjörnsson lagði upp fyrra markið og varðist mjög vel.

Fyrri úrvalslið:
2. umferð - Kári Sigfússon - Fylkir
1. umferð - Stefán Þór Pálsson - ÍR