Arteta: Klúðruðum svo mörgum góðum færum

Arsenal hafði mikla yfirburði og hefði hæglega getað skorað fleiri mörk. Martin Ödegaard tryggði liðinu þó sigurinn undir lokin með þrumuskoti utan teigs í stöngina og inn.

Arteta var ánægður með frammistöðuna en fannst sínir menn eiga að nýta færin betur.

„Þessi þrjú stig voru fyllilega verðskulduð. Úrslitin gefa kannski ekki rétta mynd af frammistöðunni því liðið var stórkostlegt. Við sýndum mikil gæði í tilraunum okkar til að brjóta þá niður en það var synd hvað við klúðruðum mörgum frábærum færum. Á öðrum degi hefði sigurinn orðið stærri,“ sagði Arteta.

Ödegaard hefur farið frábærlega af stað á tímabilinu og Arteta hrósaði fyrirliðanum.

„Martin leggur sitt af mörkum og skorar mörk sem ráða úrslitum. Það er nákvæmlega það sem við viljum frá sóknarsinnuðu leikmönnunum okkar, að þeir geti skipt sköpum. Það gerði hann í dag.“

„Við hefðum samt átt að klára þetta fyrr miðað við færin sem við sköpuðum,“ sagði Arteta.