Championship: Misstu af tækifærinu til að komast á toppinn

Charlton og QPR gerðu markalaust jafntefli á The Valley í ensku B-deildinni í kvöld og misstu bæði af tækifærinu til að komast á toppinn.

Charlton fór frábærlega af stað og vann fyrstu þrjá leiki tímabilsins en hefur nú leikið þrjá í röð án sigurs.

QPR var meira með boltann en Tyreece Campbell kom honum í netið fyrir Charlton. Fögnuðurinn var þó skammvinnur því markið var dæmt af vegna rangstöðu.

Gestirnir fengu betri færi og geta nagað sig í handarbökin yfir því að hafa ekki landað sigrinum. Charlton getur því betur við unað með stigið.

Charlton er í 5. sæti með ellefu stig en QPR sæti ofar með jafnmörg stig og betri markatölu.