Lengjudeildin: Fylkir vann HK í fimm marka leik í Kórnum

Fylkir vann dramatískan 3-2 sigur á HK í Kórnum í kvöld í fyrri viðureign liðanna í undanúrslitum umspilsins um sæti í Bestu deild karla. Guðmundur Tyrfingsson skoraði sigurmarkið úr vítaspyrnu undir lokin.

Jafnræði var með liðunum í fyrri hálfleik en Dominik Radic kom heimamönnum yfir skömmu fyrir hlé. Fylkismenn töpuðu boltanum í álitlegri stöðu og Þorsteinn Aron Antonsson sendi Radic af stað. Framherjinn geystist upp völlinn, lék á Ólaf í markinu og skoraði af öryggi.

HK fór því með eins marks forystu í hálfleik en Kári Sigfússon jafnaði þegar um tíu mínútur voru liðnar af þeim síðari. Eftir hornspyrnu barst boltinn til Guðfinns Þórs Leóssonar sem lagði hann á Kára og hann þrumaði í netið.

Átta mínútum síðar hafði Fylkir snúið taflinu við. Magnús Daði Ottesen tók niður fyrirgjöf Kára og lagði boltann aftur á Theodór Inga Óskarsson. Skot hans fór af varnarmanni, upp í loftið og í fjærhornið. Birgir Steinn Styrmisson reyndi að bjarga á línu en mistókst ætlunarverk sitt.

HK sótti í sig veðrið og jafnaði stundarfjórðungi fyrir leikslok. Karl Ágúst Karlsson fann Radic sem lagði boltann óeigingjarnt á Arnþór Ara Atlason og hann skoraði í autt markið.

Fylkismenn urðu aftur hættulegri eftir jöfnunarmarkið og fengu vítaspyrnu undir lokin þegar Birgir Steinn braut á Kára. Guðmundur Tyrfingsson fór á punktinn og þrumaði boltanum efst í vinstra hornið. Markvörðurinn valdi rétt horn en náði ekki til boltans.

HK fann ekki annað jöfnunarmark og Fylkir fer því með eins marks forskot í síðari leikinn í Árbæ eftir fjóra daga. Gott veganesti fyrir Fylkismenn en einvígið er enn galopið.