Lokaumferð 2. deildar á laugardag - Selfossi dugir jafntefli

Selfoss og Kári geta komist upp
Haukar fengu um síðustu helgi bikar í hendurnar bikar fyrir sigur í deildinni. Í lokaumferðinni ræðst hvaða lið fylgir þeim upp og þar er Selfoss í bílstjórasætinu.

Selfoss tekur á móti KFG sem berst fyrir lífi sínu í deildinni. Selfoss vann 3-2 útisigir í Garðabæ þegar liðin mættust fyrr á tímabilinu. Selfyssingum dugir jafntefli til að innsigla annað sætið.

Kári fær Hauka í heimsókn í Akraneshöllina og þarf að vinna til að eiga möguleika á Lengjudeildinni. Kári hrifsar annað sætið með sigri ef Selfoss tapar því liðið er með betri markatölu.

Þróttur Vogum og KFG í fallhættu
Þróttarar eru í fallsæti og dugir ekkert annað en sigur gegn Magna á heimavelli til að eiga möguleika á að halda sér. Með sigri er von Þróttar ansi sterk því liðið heldur sér þá ef KFG nær ekki að vinna Selfoss (sem er að berjast um að komast upp eins og áður hefur komið fram).

Garðbæingarnir í KFG halda sér ef Þróttur vinnur ekki en ef Þróttur vinnur þurfa þeir að vinna óvæntan sigur á Selfossi.