Ítalía: Slæm snerting Mikaels varð að frábærri stoðsendingu

Mikael Egill Ellertsson lagði upp fyrra mark Genoa í 2-1 sigri á Fiorentina í Seríu A á Ítalíu í dag.

Framarinn átti gott landsleikjaverkefni með Íslandi og lét strax til sín taka þegar ítalska deildin fór aftur af stað Tæpar átta mínútur voru liðnar þegar hann lagði upp fyrir Milutin Osmajic, þó það hafi ekki verið ætlunin.

Mikael náði þá frákasti í teignum en hitti boltann illa. Það kom ekki að sök því úr varð fyrirtakssending á Osmajic sem skoraði.

Sjö mínútum síðar lagði Osmajic upp annað markið fyrir Junior Messias og Genoa því komið í 2-0. Johan Vasquez varð síðan fyrir því óláni að skora sjálfsmark tuttugu mínútum fyrir leikslok en nær komst Fiorentina ekki.

Genoa er í 17. sæti með fjögur stig en Fiorentina sæti neðar á verri markatölu.