Monchi að snúa aftur í spænska boltann

Monchi hefur skapað sér afar vinsælt nafn í fótboltaheiminum og fengið mikið lof fyrir vel unnin störf hjá Sevilla, AS Roma og nú síðast hjá Aston Villa. Hann starfaði sem yfirmaður fótboltamála í tvö ár hjá Villa og var svo færður í ráðgjafahlutverk eftir slæma byrjun liðsins á yfirstandandi tímabili.

Hann starfaði hjá Sevilla í rúmlega 20 ár eftir að hafa verið varamarkvörður félagsins allan ferilinn, þar til hann lagði hanskana á hilluna 30 ára gamall og tók skömmu seinna við sem yfirmaður fótboltamála.

Monchi hefur oft á tíðum verið orðaður við ýmis stórveldi í evrópska boltanum en hann vill aðeins taka við verkefnum sem hann telur vera nægilega áhugaverð og spennandi fyrir sig.

Talið er að ráðningin á Monchi velti á því hvort Espanyol heldur sæti sínu í La Liga, efstu deild spænska boltans, eða ekki.