„Aldrei þurft að hafa neina reglu um það"

Fótbolti.net óskaði eftir viðbrögðum frá KSÍ eftir að hávær orðrómur fór af stað um áfengisneyslu leikmanna í landsliðsverkefninu, en nokkrir leikmenn eru sagðir hafa heimsótt pókerklúbb eftir leik liðsins gegn Búlgaríu hér heima.

Þorsteinn Halldórsson, þjálfari íslenska kvennalandsliðsins, var í viðtali við Fótbolta.net eftir 4-0 sigur á Króatíu spurður að því hvort að skýrar reglur væru í landsliðsgluggum hjá kvennalandsliðinu er varðar áfengisneyslu og annað slíkt.

„Nei, ég hef í raun aldrei þurft að hafa neina reglu um það," sagði Þorsteinn. Engin slík máli hafi komið upp hjá kvennalandsliðinu frá því hann tók við í byrjun árs árið 2021 og hann hafi ekki þurft að hafa neinar áhyggjur.

Þorsteinn sagði á fréttamannafundi seint á árinu 2021 að áfengi væri ekki á boðstólnum í landsliðsferðum. „Það er ekkert áfengi í gangi þannig ég hef ekki þurft að banna nokkurn skapaðan hlut," sagði Steini þá.