England: Varnarleikur Chelsea til vandræða - Markalaust á Anfield

Chelsea hefur verið feykisterkt sóknarlega á tímabilinu og Morgan Rogers reynst nákvæmlega það sem liðið þurfti, en varnarleikurinn brást í 2-2 jafnteflinu gegn Hull.

Rogers kom Chelsea yfir á sjöundu mínútu með frábæru skoti út við stöng en það dugir ekki að skora ef menn verjast ekki líka. Það fengu þeir bláu að reyna þegar Mohamed Belloumi skoraði tvívegis á sex mínútum og sneri leiknum við fyrir Hull.

Vörn Chelsea leit illa út í báðum mörkunum. Í því fyrra sendi Ryan Giles hálfgerðan vonarbolta inn í teiginn en Jorrel Hato beið eftir honum í stað þess að ráðast á hann. Boltinn skoppaði yfir höfuðið á Hato og til Belloumi, sem skoraði með flottu skoti.

Belloumi var aftur á ferðinni eftir hornspyrnu á 34. mínútu. Emi Martinez kom út úr markinu en náði ekki til boltans og Hull komst í skallafæri áður en boltinn barst út fyrir teiginn. Þar var Belloumi mættur og skot hans fór af varnarmanni og í netið.

Chelsea svaraði í síðari hálfleik þegar hinn markaóði Joao Pedro jafnaði eftir undirbúning Cole Palmer, en fleiri urðu mörkin ekki. Chelsea er með sjö stig eftir fjóra leiki en Hull átta og nýliðarnir enn ósigraðir.

Markalaust á Anfield

Liverpool og Fulham gerðu markalaust jafntefli á Anfield þar sem gestirnir náðu í sitt fyrsta stig undir stjórn Alvaro Arbeloa.

Alexander Isak fékk gott færi snemma leiks eftir undirbúning Bradley Barcola en Fulham sótti í sig veðrið og skapaði mikla hættu. Gonzalo Garcia átti að skora þegar Alisson var kominn út úr markinu en Jeremy Jacquet bjargaði á línu og átti svo aðra frábæra tæklingu nokkrum mínútum síðar.

Victor Munoz skallaði í slána en annars var Fulham sterkari aðilinn fyrir hlé. Liverpool reyndi að opna vörn gestanna í síðari hálfleik og Rio Ngumoha fékk gott færi á síðustu sekúndunum en skaut yfir.

Liverpool er því áfram taplaust með sex stig eftir fjóra leiki en Fulham komið á blað.

Dramatískur sigur Ipswich

Nýliðar Ipswich unnu hádramatískan 3-2 sigur á Crystal Palace á Selhurst Park.

Anan Khalaili kom Palace yfir á 14. mínútu en Emersonn jafnaði níu mínútum síðar eftir hörkufyrirgjöf Leif Davis. Axel Disasi gerði heimamönnum síðan erfitt fyrir þegar hann fór í glórulausa tæklingu á 34. mínútu og fékk rauða spjaldið.

Davis kom Ipswich yfir undir lok fyrri hálfleiks en Jörgen Strand Larsen jafnaði fyrir Palace þegar stundarfjórðungur var eftir. Zian Flemming átti hins vegar síðasta orðið og skoraði sigurmark Ipswich undir lokin.

Þetta var annar sigur nýliðanna, sem eru með sex stig, en Palace situr eftir með þrjú.

Delap með hörkumark í sigri á Villa

Nottingham Forest vann verðskuldaðan 2-1 útisigur á Aston Villa á Villa Park og fagnaði sínum fyrsta deildarsigri á tímabilinu.

Liam Delap kom Forest yfir með frábæru skoti utan teigs í upphafi síðari hálfleiks en Alysson jafnaði á 74. mínútu og hélt vonum Villa á lífi.

Igor Jesus tryggði gestunum hins vegar sigurinn á 88. mínútu og Villa er því enn án sigurs eftir fjórar umferðir.

Fjögurra marka jafntefli

Bournemouth og Brentford gerðu 2-2 jafntefli á Vitality-leikvanginum þar sem Kevin Schade skoraði bæði mörk gestanna.

Schade kom Brentford yfir með laglegu marki á 34. mínútu en Justin Kluivert svaraði um hæl. Marcus Tavernier kom Bournemouth síðan yfir á 52. mínútu áður en Schade jafnaði, en hann hefur verið heitur í upphafi tímabils.

Brentford er með sex stig eftir jafnteflið en Bournemouth aðeins þrjú.

Aston Villa 1 - 2 Nott. Forest
0-1 Liam Delap ('46 )
1-1 Alysson ('74 )
1-2 Igor Jesus ('88 )

Bournemouth 2 - 2 Brentford
0-1 Kevin Schade ('34 )
1-1 Justin Kluivert ('38 )
2-1 Marcus Tavernier ('52 )
2-2 Kevin Schade ('56 )

Chelsea 2 - 2 Hull City
1-0 Morgan Rogers ('7 )
1-1 Mohamed Belloumi ('28 )
1-2 Mohamed Belloumi ('34 )
2-2 Joao Pedro ('66 )

Crystal Palace 2 - 3 Ipswich Town
1-0 Anan Khalaili ('14 )
1-1 Emersonn ('23 )
1-2 Leif Davis ('45 )
2-2 Jorgen Strand Larsen ('75 )
2-3 Zian Flemming ('90 )
Rautt spjald: Axel Disasi, Crystal Palace ('34)

Liverpool 0 - 0 Fulham