Alfie Devine varð yngsti markaskorari í sögu Tottenham þegar hann skoraði í stórsigri gegn Marine úr áttundu efstu deild síðastliðinn sunnudag í FA-bikarnum.
Jose Mourinho, stjóri Tottenham, segir að Devine sé núna aftur farinn þangað þar sem hann á heima.
Mourinho var spurður að því á blaðamannafundi hvort 16 ára gamli strákurinn væri búinn að brosa allt frá því hann skoraði markið. Portúgalinn sagðist ekki vita það.
„Ég veit það ekki vegna þess að ég sendi hann aftur í unglingaakademíuna. Þegar þú kemst svona hátt upp, þá er það rétti tíminn að fara aftur þar sem hann á heima og slaka aðeins á því það er mikið sviðsljós á honum," sagði Mourinho.
„Ég vil ekki sjá hann í eina eða tvær vikur," sagði Mourinho jafnframt.
Mourinho vill greinilega að strákurinn ungi haldi sig á jörðinni. Tottenham mætir Fulham í ensku úrvalsdeildinni í dag.
Athugasemdir