Arnar Grétars: Einn besti hálfleikur sem að við höfum spilað

Valsmenn léku á als oddi í dag, þá sérstaklega í fyrri hálfleik þar sem að þeir leiddu 0-3 þegar að liðin gengu til búningsherbergja. Arnar var himinlifandi með frammistöðu liðsins í glimrandi fyrri hálfleik.

„Við erum alltaf að verða betri og betri og boltinn gengur vel innan liðsins - og góð hreyfing. Það er lykillinn. Að menn hreyfi sig þegar þeir eru ekki með boltann og þá verður það auðveldara fyrir þann sem að er á boltanum.''

Hann hélt áfram: „Þetta er örugglega einn besti hálfleikur sem að við höfum spilað það sem af er. Bara virkilega gaman og skorum falleg mörk. Mér fannst að við hefðum getað skorað meira, vegna þess að við vorum að vinna boltann svo oft hátt uppi trekk í trekk, en vorum ekki að nýta það. Ég ætla ekki að vera hrokafullur. 3 mörk [í fyrri hálfleik] á móti KA hér, það eru ekki mörg lið sem að munu gera það.''

Gengi Vals var vægast sagt vonbrigði á síðasta tímabili. Nú kveður við nýjan tón og liðið situr á toppi Bestu-deildarinnar með 16 mörk í plús, þar sem að liðið hefur unnið 6 af fyrstu 7 leikjum tímabilsins. Hvað er liðið að gera öðruvísi?

„Við þurfum bara einhverja klukkutíma í það! Við erum svosem ekkert að fara út í það, en menn gera hlutina bara á mismunandi máta og við höfum bara verið að fókusa í það að menn séu að vinna fyrir hvern annan. Þetta er liðssport og þegar að menn eru tilbúnir að hlaupa og djöflast fyrir hvorn annan að þá koma gæði í ljós. En ef menn ætla ekki að gera það og eru ekki tilbúnir að leggja sig 110% fram, þá nærðu aldrei alvöru árangri,'' sagði Arnar Grétarsson.

Viðtalið má sjá í heild sinni í spilaranum hér að ofan.