Æfingaleikur: Þróttur skoraði þrjú gegn Breiðabliki

Þróttur og Breiðblik áttust við í kvennaboltanum í gær á Avis-vellinum í Laugardalnum. Um æfingaleik var að ræða.

Nik Chamberlain þjálfari Breiðabliks og Edda Garðarsdóttir aðstoðarþjálfari voru þarna að mæta sínu fyrrum félagi en þau fóru yfir í Breiðablik síðasta haust.

Þróttur var með 3-0 forystu þegar flautað var til hálfleiks en Kristrún Rut Antonsdóttir, Sierra Marie Leilli og Sóley María Steinarsdóttir sáu um mörkin. Agla María Albertsdóttir náði að laga stöðuna fyrir Breiðablik í síðari hálfleiknum með marki af vítapunktinum.

3-1 sigur Þróttar staðreynd en Þróttur mætir Fylki á útivelli í fyrstu umferð Bestu deildarinnar næsta mánudag en Breiðablik fær Keflavík í heimsókn á Kópavogsvöll.