5. deild: Stokkseyri á toppinn

Það voru mikil læti í eina leik dagsins í 5. deild karla þegar Knattspyrnufélagið Miðbær fékk Stokkseyri í heimsókn.

Karabo Mgiba kom KM yfir í fyrri hálfleik en Marteinn Maríus Marinósson jafnaði metin fyrir Stokkseyringa svo staðan var jöfn, 1-1, í leikhlé.

Arilíus Óskarsson kom Stokkseyringum yfir skömmu eftir leikhlé og á 70. mínútu fengu tveir leikmenn heimamanna að líta seinni gulu spjöldin sín á sama tíma.

Gabríel Ernir Midjord Jóhannsson og Daníel Dagur Henriksson fengu báðir reisupassann þegar staðan var 1-2 fyrir gestina frá Stokkseyri.

Níu heimamenn náðu ekki að jafna metin. Þess í stað innsiglaði Hafþór Berg Ríkarðsson sigur Stokkseyringa á 85. mínútu. Lokatölur 1-3.

Leikmenn KM voru ósáttir að leikslokum og mótmæltu dómgæslunni. Samkvæmt vefsíðu KSÍ fengu markvörðurinn Karolis Dovydas Zukauskas og forráðamaðurinn Joaquin Linares Cordoba að líta bein rauð spjöld í liði KM eftir lokaflautið.

Stokkseyri fer á topp B-riðils með sigrinum. Liðið er þar með 13 stig eftir 6 umferðir en getur misst toppsætið aftur til Hamranna sem eiga leik til góða gegn botnliði KB.