Heim til að lægja öldurnar

Stjörnubíó
Þetta hefur verið virkilega stormasamt tímabil í Garðabænum og hver höndin upp á móti annarri. Fjallað hefur verið um deilur bak við tjöldin, furðulegt andrúmsloft í klefanum og furðulegar ákvarðanir.

„Mig óraði ekki fyrir stöðunni sem var komin upp í klúbbnum. Það er öllum ljóst að það er mikil gjá á milli fólksins í Garðabæ, stuðningsmanna, leikmannahópsins og stjórnar. Það er mikil gjá á milli þessara hópa sem myndar að mörgu leyti eitrað andrúmsloft í félaginu," sagði Jón Þór í viðtali við RÚV eftir að hann var rekinn.

Rúnar Páll á að vera sameiningartáknið sem á að fylla upp í þessa gjá og lægja öldurnar hjá félaginu. En hann á að gera meira en það, miðað við yfirlýsingu Stjörnunnar í gær er metnaður stjórnarinnar meiri en að sigla lygnan sjó.

Vilja aftur í fremstu röð
„Innan knattspyrnudeildarinnar er mikill metnaður fyrir því að koma Stjörnunni aftur í fremstu röð íslenskrar knattspyrnu og berjast um titla. Jafnframt viljum við endurvekja þá einstöku stemningu sem hefur áður sameinað bæinn og efla samstöðuna sem býr í samfélaginu okkar í Garðabæ," segir í tilkynningu Stjörnunnar.

Rúnar Páll hefur gert frábæra hluti hjá Gróttu síðustu tvö ár en skrifaði undir nýjan samning nýlega. Það kæmi manni ekki á óvart ef sá samningur hafi verið með sérstaka 'Stjörnuklásúlu' fyrir hans félag.

Stjarnan tilkynnti aldrei um ráðningu á bráðabirgðaþjálfurunum þremur sem hafa stýrt liðinu að undanförnu og aftur á fólk að giska í eyðurnar eftir tilkynningu félagsins í gær. Ekkert er minnst á samningalengd eða hvort Rúnar muni stýra Stjörnunni í síðustu tveimur leikjum þessa tímabils. Það kemur vonandi betur í ljós í dag.

Fer Heimir í ÍA?
Heimir Guðjónsson var sterklega orðaður við Stjörnuna og hefði vafalítið verið annar góður kostur í að takast á við verkefnið stóra í Garðabænum. En núna þegar Rúnar Páll er mættur aftur þá er spurning hvar Heimir mun þjálfa næsta sumar?

Eftir að hafa mistekist að koma Fylki upp úr Lengjudeildinni í ár hafa verið virkilega háværar sögusagnir um endurkomu Heimis í Bestu deildina. Þjálfarakapallinn er farinn af stað og Heimir orðaður við ÍA og KA.

Slúðrað hefur verið um að Heimir hafi setið fund með Skagamönnum en óvíst er hvort Lárus Orri Sigurðsson verði áfram þjálfari þeirra gulu. Sú óvissa endurspeglaðist vel í viðtölum við hann og formanninn sem birtust í vikunni. Það færu allavega fáar hökur í gólfið ef Heimir yrði kynntur á fréttamannafundi á Akranesi á næstu vikum.