Cole Palmer var allt í öllu í stórsigri Chelsea gegn Everton í eina leik kvöldsins í ensku úrvalsdeildinni, þar sem hann skoraði fjögur af sex mörkum leiksins.

Palmer setti þrennu á sextán mínútna kafla í fyrri hálfleik áður en Nicolas Jackson bætti fjórða markinu við fyrir leikhlé.

Í síðari hálfleik skoraði Palmer fimmta mark leiksins úr vítaspyrnu, áður en Alfie Gilchrist kom inn af bekknum og setti sjötta og síðasta markið í uppbótartíma.

Mörkin sem Palmer skoraði voru lagleg og sýndi hann mikla hæfileika til að ganga frá fallbaráttuliði Everton.

Chelsea er ekki nema þremur stigum frá Newcastle og Manchester United sem sitja í Evrópusætum og getur gert alvarlega atlögu að þeim sætum með góðum lokaspretti á enska úrvalsdeildartímabilinu.

Everton er aftur á móti aðeins tveimur stigum frá fallsæti en með leik til góða á næstu lið fyrir neðan.

Eftir þessa fernu er Palmer búinn að skora 20 mörk á úrvalsdeildartímabilinu og er hann markahæstur í deildinni ásamt Erling Braut Haaland.