Davíð Smári: Hefði kannski átt að sleppa því að tala um það

„Ég er samt gríðarlega ánægður með liðið mitt, gríðarlega ánægður með það sem menn lögðu í leikinn. Mér fannst við skapa helling í þessum leik, komum okkur í fullt af ákjósanlegum stöðum, vantaði kannski pínu upp á hjá okkur á síðasta þriðjungi. Þetta er svekkjandi en ég er griðarlega sáttur með vinnuframlagið alveg fram á 97. mínútu."

KA jafnaði og komst yfir eftir hornspyrnur.

„Bæði mörkin á fjærstönginni. Svekkjandi. Ég hélt að Marvin væri með annan boltann, hann fer einvhern veginn fer fram úr honum. Slæm mörk að fá á sig og slæmur tími að fá þau á sig. Við urðum fyrir dálítið af áföllum í dag og höfum orðið fyrir dálítið af áföllum í sumar. En mér fannst við sýna að það er fátt sem bítur á okkur. Ég verð að vera stoltur af liðinu mínu. Ég er stoltur af því hvar við erum sem fótboltalið í dag."

„Það hefur verið mikið í umræðunni að við erum aðeins að vinna í öðruvísi aðstæðum. Það er bara eins og það er. En þú sérð að vinnuframlagið er til staðar og ef við tökum þetta með inn í næstu leiki og inn í sumarið þá erum við bara á fínum stað í sumar."

Tóku enga sénsa með Elmar
Davið talaði um áföll í sumar en liðið hefur í byrjun móts misst þá Fatai Gbadamosi og Eið Aron Sigurbjörnsson í langtíma meiðsli. Í dag fóru þeir Friðrik Þórir Hjaltason og Elmar Atli Garðarsson af velli í fyrri hálfleik vegna meiðsla.

„Friðrik fór í nára og ég veit ekki nákvæmlega stöðuna á Elmari. Honum leið eins og það hefði eitthvað gerst inni í eyranu á sér og var ekki alveg í jafnvægi. Við tókum enga sénsa með það."

„Þeir fara út og mér fannst þeir sem komu inn standa sig mjög vel. Þrátt fyrir að við séum ekki með stærsta hópinn í deildinni þá finnst mér allir klárir og á ákveðinni vegferð. Staðan er sú að við ætlum okkur ákveðna hluti í sumar og fyrsta markmið er að halda okkur í deildinni. Ég held að við gerum það með þessari frammistöðu."

Pirrandi meiðsli
Tarik Ibrahimagic var ekki með í kvöld og er tæpur fyrir leikinn gegn Víkingi. Enn er svo óvíst hvenær varnarmaðurinn Morten Ohlsen snýr aftur.

„Það hefur gengið erfiðlega að fá almennilega greiningu á þessu. Við vorum að vona að hann gæti tekið þátt í dag en svo kom ákveðið bakslag í það. Ég get ekki svarað þessu með Morten, eins pirrandi og það er. Hann er búinn að vera frá síðan í fyrsta leik," sagði Davíð.

Í viðtalinu ræðir hann um næsta leik gegn Víkingi og heimavöllinn á Ísafirði. Viðtalið má nálgast í spilaranum efst.