Tuchel: Engum nema dómaranum að kenna

Tuchel telur að sínir menn í Chelsea hafi átt skilið að vinna leikinn enda sýndu þeir mikla yfirburði í leiknum. Hann kennir Anthony Taylor dómara um jafnteflið og telur svona dómaramistök vera einstaklega svekkjandi á tímum VAR.

„Ég er vonsvikinn því við áttum skilið að vinna en við gerðum það ekki útaf tveimur ólöglegum mörkum. Þetta eru mörk sem áttu ekki að standa og það er mjög erfitt að samþykkja svona dómgæslu þegar við erum með VAR herbergi," sagði Tuchel við BBC að leikslokum.

„Þetta hefði verið verðskuldaður og mikilvægur sigur fyrir okkur. Leikmennirnir áttu skilið að vera verðlaunaðir með sigri, þeir voru frábærir á öllum sviðum bæði með og án boltans. Ég er ótrúlega ánægður með frammistöðuna og mér finnst leiðinlegt að segja þetta en dómarinn eyðilagði leikinn - enginn annar.

„Strákarnir eru auðvitað svekktir en ég held að þeir hafi samt áttað sig á því hversu vel við spiluðum í dag."

Bæði Chelsea og Tottenham eru með fjögur stig eftir tvær fyrstu umferðir tímabilsins. Chelsea þurfti vítaspyrnu til að sigra gegn Everton í fyrstu umferð á meðan Tottenham skoraði fjögur gegn Southampton.